வாசுதேவ நல்லூர் அதிமுக எம்.எல்.ஏவான மனோகரன் ஓ.பன்னீர் செல்வத்திற்கு தனது ஆதரவை தெரிவித்துள்ளார்.

அதிமுக பொதுச் செயலாளரான சசிகலாவுக்கு எதிராக தமிழக முதல்வர் ஓ.பன்னீர் செல்வம் தெரிவித்த கருத்துகள் தமிழக அரசியல் சூழலில் பெரும் சூறாவளியை ஏற்படுத்தியுள்ளது. ஏற்கனவே தனது முதல்வர் பதவியை ராஜினாமா செய்துள்ள ஓ.பி.எஸ், தனது ராஜினாமாவை திரும்பப் பெறுவேன் எனவும் தெரிவித்திருந்தார்.

இதனைத் தொடர்ந்து அதிமுகவின் முன்னாள் எம்.எல்.ஏக்களும்,சசிகலா அதிருப்தியாளர்களும் ஓ.பி.எஸ்சுக்கு ஆதரவு தெரிவித்து வருகின்றனர்.இது தவிர தற்போதைய அதிமுக ஆட்சியில் இடம்பெற்றுள்ள அக்கட்சி எம்.எல்.ஏக்கள் ஆறுகுட்டி,மனோ ரஞ்சிதம் மற்றும் மாணிக்கம் ஆகியோர் பன்னீர் செல்வத்திற்கு தங்கள் ஆதரவை தெரிவித்திருந்தனர்.

இந்நிலையில் வாசுதேவநல்லூர் சட்டமன்ற தொகுதி அதிமுக எம்.எல்.ஏவான மனோகரனும்,பன்னீர் செல்வத்திற்கு தனது ஆதரவை தெரிவித்துள்ளார்.இதன் மூலம் ஓ.பி.எஸ்க்கு ஆதரவு தெரிவித்துள்ள அதிமுக எம்.எல்.ஏக்களின் எண்ணிக்கை 4-ஆக உயர்ந்துள்ளது.இன்னும் சில நாட்களில் மேலும் சில எம்.எல்.ஏக்கள் ஓ.பி.எஸ்க்கு ஆதரவளிக்கலாம் என எதிர்பார்க்கப்படுகிறது.